Watu 970 walipoteza maisha nchini Tanzania katika kipindi cha miezi sita ya kwanza ya mwaka 2026 kutokana na matukio 936 ya mauaji yaliyoripotiwa.
Mchanganuo huo unatokana na Ripoti Rasmi ya Hali ya Uhalifu iliyotolewa na Jeshi la Polisi kwa ushirikiano na Ofisi ya Taifa ya Takwimu (NBS), ikionyesha ongezeko la asilimia 1.1 la makosa hayo ikilinganishwa na matukio 926 yaliyoripotiwa kipindi kama hicho mwaka 2025.
Kati ya waliofariki, wanaume walikuwa 722 na wanawake walikuwa 248. Taarifa hiyo inabainisha kuwa ugomvi wa majumbani na kifamilia ndicho chanzo kikuu, ukisababisha vifo vya watu 284 (sawa na asilimia 36 ya matukio yote). Vyanzo vingine vikuu ni pamoja na wivu wa kimapenzi (174), kujichukulia sheria mkononi (153), ugomvi katika vilabu vya pombe (114), imani za kishirikina (58), na migogoro ya ardhi (54).
Kijiografia, mikoa ya Dodoma, Kagera, na Tanga imetajwa kuongoza kwa idadi kubwa zaidi ya matukio ya mauaji, ikifuatiwa na Morogoro na Kigoma. Jeshi la Polisi limeendelea kutoa wito kwa jamii kuacha tabia ya kujichukulia sheria mkononi na badala yake kutumia vyombo vya sheria, viongozi wa kimila, na taasisi za kijamii kutatua migogoro ili kunusuru maisha ya wananchi.
Tazama infographic kwa mchanganuo kamili wa takwimu hizi.
